Amiirow Adiga Maad Isqarxisid??

Waa dood dhexmartay Amiirka Alshabaab iyo Oday Xareed oo ku saabsan sababta uu Amiirka isku qarxin waayey.  Alshabaab halka ay u socdaan. Doodu sidan ayey u dhacday:-

Amiirka: Oday Xareedow waa in aad Jihaadka Alle taageertaa oo aad naftaadda, 

hantidaadda iyo caruuraadda kaga qayb qaadataa. 

Oday Xareed:  Adeerow saakay ilmahayga debka looma shidin,

 wiilkaygii macalinka ahaa ee masruufka inoo soo xoojin jiray Iskoolkii waad ka xirtay,

 markii uu diiday in uu manhajkiina dhigo, hay'adii mucaawinada nasii jirtay waad erisay, 

Gabadhii suuqa khudaarta xoogaaga ka keeni jirtay, Wiil Muhaajir waaye la yiri ayaad u guurisay , 

kii yaraa ee Beerta fali jirayna bishii hore ayaa la qafaalay,  warkiisana geeri iyo nolol ma hayno,

 Adeer ma noolin adiguna Jihaad baad ka hadlaysaa!!

Amiirka: Adeer Sabar, Sabar , Nasriga waa dhow yahay, 

silica nolol ee aad ku jirto waxaad kaga biixi kartaa in aad Jihaadka gasho oo aad Ilaaheey dartii

 u shahiido.  

Oday Xareed:  Anigaa... intii aad duruuftayda wax ka qaban lahayd, 

miyaad anigii debka i saari rabtaa, oo yaan uga tagaa lixda canug ee yicista ah iyo hooyadood?

Amiirka: Ilaaheey uga tag, kistan lacagta ah sii adiga iyo macalinka Iskuulkana soo baxa oo

 Jihaadka soo gala, weliba adiga waardiyahayga, gaarka ah ayaad noqonaysaa.

Oday Xareed: Maya aniga caruurta aan ku haro oo meelahan wax uga raadiyo, ee wiilka waardiye

 ha kuu noqdo. 

Amiirka: maya wiilkan afka qalaad ayuu yaqaanaa, mobile na wuu sitaa, waardihaygu waa in 

uusan afka qalaad aqoon iyo sida mobile loogu hadlo 

 

Oday Xareed oo cagaj iidaya ayaa babuurkii Amiirka dusha kaga dhacay qoraygiisiina garabka 

surtay. Oday Xareed ma oga, laakiin labadiisii wiil waxay ku dhinteen dagaalka, gabadhiisii way

 isdishay markii ay u dulqaadan waysay xadgudubka iyo dhaqan xumida Muhaajirka 

Afgaanistaan ka ah, Islaantiisiina lixdii canug ayey la qaxday. Amiirka maadaama uu 

dhuumaalaysi ku jiro, wejigiisa waardiyuhu ma arkaan, sedex saacadood oo xiriir ah

 meel ma joogo, laba habeen oo isku xigtana goob kuma wada hoydo. Fariimaha 

qoraal ayaa looga qaadaa, dadka u yimaadaana waa fara ku tiris , rag iyo haween midka ay 

yihiina lama kala garto  jalbaab iyo indho shareer ayaa u wada xiran.

Oday Xareed wuxuu maanta fursad u helay in uu Amiirka la quraacdo, wuxuunna go'aansaday in

 uu kula dhiirado su'aalo in badan ku soo noqnoqday maankiisa

 Amiirow Walaahi nolosha aan ku jirnaahi waa silic iyo saxariir, waxaa naloo qaatay in aan 

shahiidno ee maan dagaalka galno ama camilyad istishhaadi (is qarxis) ah noo raadisid? 

Sidaan dhimashaa dhaanta!!

Amiirka: Maya, waa sidee Oday Xareedow, mar hadii Amiirka uu shahiido, Jihaadka wuu

 istaagayaa, wax hawsha kala wedeyana ma laha.

 Oday Xareed: ilaa goorma ayaan silicaan ku jiraynaa? Horta Amiiroow waxaanse ku waydiiyey

Jihaadka goorma ayaa lasoo  afjarayaa?

Amiirka: Maya, iimaanka xajiso, Dagaalka waan wedeyaa intii dawlad Islaami ah aan dalka

 ka dhiso.

 

Oday Xareed:  Dawladani Islaan maaha miyaa?    

Amiirka: Islaam maaha ee waa murtad.

Oday Xareed: Haa, hadaan gartay Dawlad sida Sacuudiga ah, oo Mutadhawiciintu xiliga Salaada

, goobaha Ganacsiga xirayaan, maashaa Alaah, haweenku xijaaban yihiin, 

Maxram la'aan aysan bixi karin, oo xitaa baabur in ay wadaan loo ogolayn, 

ruuxii wax xada gacanta la goynayo, kii sino lagu helo la karbaashayo,

 khamrigu mamnuucyahay, xaramkii ku yaal, Boqorkuna uu Khaadimul Xaramaynka yahay, 

miyaa?

Amiirka: war ma waalantanay Oday Xareedow, waaba Murtadka ugu   Hade Amiirow 

waa caynkee Dawlada Islaamiga ah ee aan raadinayno? Xageese aduunka ka jirtaa?

Amiirka: Meelna weli kama hirgelin oo inagga ayaa halgankeeda wadna.  

Oday Xareed: Kontanka (50) ka dawladood ee Islaamka ah midkoodna Islaam maaha

 miyaa Amiirow?

Amiirka: Waa sidaas dhamaantood Dastuur dhaaquud ah ayey isku xukumaan,

 Oday xareedow wadadu way dheertahay, Gaalo iyo Reer Galbeed inta ay aduunka haystaan 

waxba noo suuroobi mayaan, sababtoo ah Dimoqoraadiyad ayey wadaan, dagaalka waan 

wedeynaa ilaa aan awoodooda ka wiiqno oo aan dalalka Islaamka ka xoreyno, markaa 

ka dib ayaan dawlad  Islaami ah dhisaynaa.

Oday Xareed: Suudaan iyo Iiraan dadku waxay sheegaan inay reer Galbeed kasoo horjeedaan,

 dawlado Islaami ahna ka dhisan yihiin, miyey na taagerayaan?

Amiirka: War ma waalan tahay Oday Xareedow, Iiraan waa Shiico Gaalo ah, S

uudaana niman Cilmaaniyiin ah oo Islaam sheeganaya ayaa xukuma, Islaam waxba kama oga.

  Oday Xareed:  Intii aad Gaalo iyo reer Galbeed ka adkaanayno dagaalka ma soconayaa,

Amiirka:  Haa deer waa soconayaa dagaalku inta la guulaysanayo ama aanu ka shahiidayno.

 Oday Xareed: Ma yadaa Soomaaliba mid ka harayaa hadii aad dagaalka wedeyso intii 

aan Gaalo iyo reer Galbeed ka adkaanayno.

Amiirka: Soomaali baad ka hadlaysaa? muhiim maaha Soomaali hadii ay gedigeed go'do ee uu

 Islaamku guulaysto taasaa muhiim ah.

Oday Xareed:   Soomaalidan colaada, abaarta, gaajada iyo cudurka laayey oo lugaha 

qaadi la' a Miyaa dunida xoraynaysa?

Amiirka: Hadiiba ay baaba'ayaan in ay Diinta ku baaba'aan Maxaa uga fiican?

 Awal miyaa nolol aduunyo macno lahayd.

Oday Xareed: Amiirow, ka waran hadii ay Ilaaheey dartii u noolaadaan. 

Waxaanse ku waydiiyey Culimadii Soomaaliyeed ee soo jireenka ahaa arrinkaan ma kula qabaan?

Amiirka: ku waas waa Culimadii Dawlada, waxa mabda' ma lahan.

Oday Xareed: Ka waran kuwii Jihaadka nala waday, Ibraahim Afgaan, Sheekh Burhaan, 

waa la dilay,  Sh Xasan Daahir iyo Sheekh Mukhtaar Roobow way carareen, 

ee Amiirow yaa inoo haray?

Amiirka: Kuligood qadiyadii ayey Khiyaaneen, waajibkooda ayaana la marsiiyey

Oday Xareed: walee waa yaab, hadii dadkii Khaa'in, Murtad, Gaal, Mushrik ay noqdeen

 Maxaa haray ?

Amiirka : Oday Xareedow, iimaanka adkayso, da'yar Soomaaliyeed oo qalbigoodu maran yahay

 ayaan mar walba heelan, kuwaasoo Diinta u heelan oo naftood hurayaal ah, 

maxaan dadka nolosha ugu diidanahay waa in rajo aan anaga ahayn aysan yeelanin. 

Adiga miyaa Jihaadka ku soo biiri lahaa, hadi aan wiilkada Iskoolka ka xiri lahayn, 

Gabadhaada Muhaajir loo guuri lahayn, kii beerta kuu falayey jihaadka loo qafaali lahayn,...

Oday Xareed oo ganuunacaya hadalkana kor u qaadi karin ayaa hoosta wuxuu ka yiri,

 War talow Amiirku doqonsanaa, hadii dadka waardiyeeya ama u diriraya ay sidaas wada yihiin 

oo uu mustaqbal la'aan wada dhigay, siduu doonayaa inuu ku sii noolaado. 

Hadii aanan anigu fursad u helin, walee mid kale ayuu gacantiisa ku baxayaa, 

halkii uu Godane maray uun buu marayaa. .

CABDI RAHMAN CABDI SHAKUR AYA QORAY